دوماھیک ھەلبەستا دونیایێ
دەمەک دێ ھێت
دێ خولەک دەستێ دەمژمێرا گرن
دێ ڕوژ ھەلات دگەل ڕۆژ ئاڤای نڤت
دێ سپێدە دگەل ئێڤاری چتە سەمایێ
دێ ئاگر د ھەمبێزا ئاڤێ دا نازداربت
دێ گورستان خوە بو بارانێ ئامادەکت
جوتیار دێ کفنا بو گولبەڕۆژان درین
دێ ژن چاڤێن دارێن زەیتونا کلدن
دێ میوزیکژەن تژی گوھێن بایی میوزیک کن
دێ شێوەکار تابلویا ب پێیێن بالندەیان ڤە ھلاویسن
دێ ڕۆندک تژی چاڤێن گولا بن
دێ جەنگ بێژنە سنوران ھەڕن ھوین ئازادبوون
وی دەمی دێ دایک دەستێ وەلات و ئاخێ گرت
جانگوری دێ ناڤێن خوە ل سەر کێلیا ژێبن
دێ فیشەک بێھنەکێ گرین و پاشی ھێدی ھێدی دێ پشکڤن
دێ پێنوس خوە نڤیسن
و ڕۆناھی و تاڕی بنە ئێک ڕێک
دێ ھەیڤ و ھەتاڤ ملێن خوە دنە ئێک و چن
و فریشتە و ئەھریمەن دێ ئێک و دوو ماچی کن
دێ ژیان و مرن ھەڤژینیێ پێکئینن
و دوزەخ و بەھشت تێکەلی ئێک بن
دێ گەردوون ژ کەیفادا کراسێ خوە ئێخت
و خودێ ل ھنداڤی ھەر تشتی ڕاوەستت و تەماشەکت
ئەز و تو دێ ب دەنگەک بلند ژ بۆ خودێ باسێ بتنێبوونا خوە یا ئازار کن
وی دەمی دێ ئاھەک ژ گەوریا ئەردی دەرکەڤت
و بێژت: خودێ چەند بتنێبوونا تە خوەشە!