قەبرستانا گۆلبەڕۆژان
ھوین ڤێ زەڤیێ دبینن،
دناڤدا ھەلامەتان سەما دکر!
بالندە ل ھنداڤی سیبەرا خوە دفڕین !
ھەتاڤ ژ سەرێ ئاسمانی ھاتبوو خوار
و ل ھنداڤی پرچا وێ د ڕاوەستیا
ھەتاڤەکێ نە دڤییا ل خوە بزڤرت،
دا لەشێ خوە نەبینت!
شەڤەکێ نە دڤییا کراسی بکتە بەرخوە!
ژ بەر بەدەنا وێ،
دەڤێن ڕویباران زۆھا ببوون!
و دەڤێن زۆھا ببوونە ڕویبار!
سەرێن تژی،
خوە ب بەژنێن زراڤ ڕاگرتبوون
و بەژنێن زراڤ خوە ب ڕھێن ستویر ڕاگرتبوون
ھێشتا ئەو ب بەژنا خوەڤە کەسکن،
لێ نوکە سەرێن وان شۆر بووینە
و دویکێل ژێ دفڕت!
ڕوویێن زەر یێن ڕەشبووین
و ل ھنداڤی وێ کوخ کوخا ڤێ بای یە
ل پشت ڤێ دویکێلێ،
چاڤێن ھەتاڤێ تژی بووینە ژ ڕوندکان؟
ھەتاڤەک نەشێت بگریت،
دا نەڤەمرت!
عەورەک نەشێت تەپا ل پشتا خوە بدت
و دڤێت ببارت!
ئەڤ ئاخە گەلەک خوەلی ل سەرە،
کی دێ سەرێ وێ شوت؟
کی دێ کفنەکێ ل بەر سەرێن سوتی کت
و نەھێلت ڕەش ببت؟
ل ڤێ کومەلگەھێ،
ھەمی گۆلبەڕۆژن،
ژ کاکلکا خوە شوینبووینە
ب گریا خوە ھاتینە ئاڤدان
مەزن دبن ... مەزن دبن سەرێن وان دھێنە بڕین!؟