باژێرێ جلوبەرگا

مللەت محەمەد

د باژێرەکێ دا، ساکویەک و پەنتەرونەک ژ بێ کاری ل بەر دیواری د ڕوینشتیبوون، ساکو د ھزرادا نوقوم ببوو، د دەمەکێ دا ھزرەک بو چێبوو کو بۆ دەمەکێ ژ باژێری دەربکەڤت و بەرەڤ چیایی بچت، گۆتە پەنتەرونی من ببە چیای.پەنتەرون ڕابوو ل سەر خوە و ئەو لێ سواربوو. پشتی گەھشتینە نیڤا چیایی، ل پشت کەڤرەکێ مرۆڤەکێ ڕویس دیت و یێ ب توڕەیڤە بەرا ژ چیای بەردتە خوارێ. ساکوی گۆتێ: بۆچی تو یێ توڕەیی. گۆت: جلوبەرگێن من ئەز ھێلام و چوو ، چونکو بو دەمەکێ ئەز مامە د کانیەکێ دا. ساکوی گۆتێ خەمگین نەبە، مە بکە بەرخوە. ئەوی پەنتەرون کرە بەرخوە و دویڤدا ساکو، لێ ساکو یێ تەنگبوو بو وی، ب زووری کرە بەرخوە. ساکوی گوتێ ھێدی تە بن کەفشێ من دڕاند. پشتی قولپک گرتین مەشکا وی دیار دکر. ساکوی گۆتێ قولپکا ڤەکە ھوسا ھەناسەیا من کورتبوو . پاشی گۆتێ ناڤێ تە چییە. گۆت چیایی یە. گۆتێ دا ژ چیایی بچن خوار لێ پێدڤییە تو د ناڤ باژێری دا ناڤێ خوە ب گوھوری و بکیە باژێری. چیایی ڕازیبوو و پێگڤە چوونە دناڤ باژێری دا، دیت باژێر تژیە ژ جلوبەرگێن ڤالا، بو جل و بەرگا سەیربوو پشتی ئەو دیتی، ھەمی ژ بو وی چوونە کرنوشێ. پترییا ساکویا ژ پەنتەرونێن خوە کەڤتن، دەمێ چووینە کرنوشێ. چاڤێن چیایی ب ھندەک جلوبەرگێن مارکە کەڤت، ئێکسەر یێن ل بەر خوە ئێخستن و کرنە د زبلدانێ دا و یێن مارکە کرنە بەرخوە، پاشی پلەک ل ساکویێ خوە یێ نوی دا و گۆت: ژ ئەڤرو پێڤە ئەز باژێریمە یێ کەڤن بت دێ وی دڕینم.