سوپەرمانێ تەقنێ 

پترییا جارا دەمێ سپێدێ ژ مال دەرکەفتبا و قەستا من کربا، دا تشتەکێ خوە ژبیرکت یان دا بێ قایش دەرکەڤت یان ژی جارا دا قولپکا قەمیسێ خوە یا ئێکی ئێختە کونا دوویێ. بتنێ ئەڤ ڕەفتارە دکرن دا خەلکێ گوندی بێژت: ھزرمەندە و سەروبەر بو وی گرنگ نینە. جارا پەرتووک ددەستێن خوە دا دھەلگرتن و وەکو پەرتووکێن قوتابخانێ ب تنێ ناڤ و نیشان دخواندن، دا خەلکەک ھزربکت ڕەوشەنبیرە، ھەردەم دگۆتە من، حەز ژ ڕەگەزەکێ دکم، دەمەک درێژ دەربازبوو، گەلەک ژنا کورێن خوە ب وی ناڤکرن و گەلەک کچا خوە نێزیکی وی دکر. ڕۆژەکێ " ئاغایێ گوندی" گۆتە ڕەشەکێن خوە کا گازی وی کوری بکن، چدکت ھەتا بوویە سوپەرمانێ گوندی، وەدیارە ئەو دێ جھێ من گرت. ڕەشەک چوونە دویڤڕا و ئینانە نک ئاغایی

- بەلێ ئەزبەنی تە چ ژمن دڤێت

دەمێ گوتی ئەزبەنی ، ئاغای د دلێ خوە دا گۆت ئەڤی چ ئاریشە دگەل دەستھەلاتا من نینە. ئاغای گۆتێ بتنێ من ڤیا تەبینم کا بوچی ھوسا ناڤ و دەنگێ تە بەلاڤەبوو، ھەگەر تە ئاریشەک ھەبت بێژە من دێ بوتە چارەسەرکم.

- نە ئەزبەنی من چ ئاریشە نینن، بتنێ نەھێلن چ کەسەک بھێتە د ڕێکا مندا.

ژ کوچکێ دەرکەڤەت و بەرەڤ مال چوو و ل سەر کارێ خوە بەردەوامبوو، ل بەر دارا بوریبا دا ب بەژنا وانڤە بێژت، ل بەر بەرا بوریبا دا ب ڕەقاتییا وانڤە بێژت. خوە ھەتا ب ئاسمان و تەیرو تەوالاڤە دنڤیسا. خوە ژ بیرکربوو ب ھەستێن خوە ڤە مژیلبوو، چ جار نە دگۆت یێ خەلەتم، بەلکو گەلەک پەسنا خوە دکر ژ درەو. ڕۆژەکێ ھندی دلێ وی فیرییا سەرێ وی زێدە گەرمبوو ، چوو سەربانی و گازی خەلکێ کر و گۆت: ئەز دێ فڕم... ئەزدێ فڕم ... ، ھندی زەلاما و کورا گۆتێ وەرە خوار ما تو بالندەی، ژنا و کچا گۆتێ دێ بفڕە مە باوەری بتەھەیە، کورێن بناڤێ وی ھاتینە ناڤکرن یاری د ناڤ تەقنێ دا د کرن، سەڕێ وی گەلەک گەرمبوو ئێکسەر خوە ھاڤێژت و کەڤتە بەر پێیێن زارۆکا، سەرێ وی چوو دناڤ تەقنێ ڕا و تەزی.